د ایران او اسرائیل د پوځي ډغرې په اړه دوامداره غبرګونونه/ پاپ د سولې د ټینګښت غوښتنه کړې

ایکنا - د کاتولیک نړۍ مشر پاپ «لیون څوارلسم» د ایران او صهیونیستي رژیم ترمینځ د پوځي ټکر  په غبرګون کې د عقلانیت غوښتنه وکړه او د خبرو اترو او سولې د ټینګښت لپاره ئې د هڅو غوښتنه وکړه.

یکنانیوز راپور راکوي، پاپ لیون څوارلسم پرون (د غبرګولي ۲۴مه) د ایران او اسرائیلو له چارواکو وغوښتل چې د وروستیو هوایي بریدونو وروسته په منطق عمل وکړي او خبرې اترې تعقیب کړي.

د راپور پراساس، څوارلسم پاپ په سینټ پیټر کلیسا کې خلکو ته وویل، چې دی په  ډېرې اندېښنې سره حالات څاري.

پاپ وویل: په ایران او اسرائیلو کې وضعیت په داسې حساس وخت کې په جدي توګه خراب شوی دی. زه غواړم په ټینګار سره د مسؤلیت او منطق غوښتنه بیا تکرار کړم.

 د پاپ غبرګون په داسې حال کې دی، چې تر اوسه پورې بېلابېلو هېوادونو او نړیوالو چارواکو د صهیونیستي رژیم د دې تجاوزکارانه اقدام په اړه غبرګونونه  ښودلی دی.

په ویانا کې په نړیوالو اورګانونو کې د اروپايي اتحادیې دایمي استازي او سفیر پر ایران د  صهیونیستي رژیم  ترهګریز برید او په سیمې کې د تاوتریخوالي د زیاتېدو احتمال په اړه اندېښنه څرګنده کړه او د ایټمي تاسیساتو د خوندیتوب او امنیت پر ساتنې ئې ټینګار وکړ.

د پاکستان د لومړي وزیر مرستیال او د بهرنیو چارو وزیراسحاق ډار د صهیونیستي رژیم ترهګریز برید د بشري وجدان د متزلزل کېدو لامل وباله او وې ویل: پاکستان د ایران د اسلامي جمهوریت د خلکو او حکومت تر څنګ ولاړ دی.

د ترکیې د  پارلیمان مشر هم په ایکس ټولنیزچینل کې په یوه پیغام کې پر ایران د صهیونیستي رژیم برید غندلی دی.

د لیبیا د بهرنیو چارو وزارت هم پرون (شنبې) په یوې  اعلامیې کې د صهیونیستي رژیم د جمعې سهار پر ایران هوایي بریدونه په سختو ټکو غندلي او د تاوتریخوالي د سمدستي بندولو غوښتنه کړې ده.

د صهیونیستي رژیم د بریدونو په تعقیب، چې د بېلابېلو هېوادونو له غندنې سره مخ شوي، عبري رسنیو راپور ورکړ، چې د ایران د توغندیز ځواب په پایلې کې تر اوسه  کابو ۱۷۰ کسان ټپیان شوي او۱۷ صهیونیستان وژل شوي دي.

https://iqna.ir/fa/news/4288526